Azərbaycanda gedən inkişaf prosesi təhsil sistemində nəzərəçarpan dəyişikliklər və ürəkaçan yeniliklərlə müşaiyət olunur. Azərbaycan Respublikası Prezidentinin təhsilin inkişafına göstərdiyi qayğı və Təhsil Nazirliyinin gördüyü əməli işlər öz bəhrəsini verməkdədir. Ölkəmizin təhsil sistemində baş verən köklü islahatlar, yeni tikilən və yenidənqurulan məktəblər, müəllimlərin peşəkarlığının artırılması üçün görülən işlər, yeni dərsliklərin çapı kimi gələcəyə hesablanmış tədbirlər öz gözəl nəticələrini savadlı və bacarıqlı gənclərin yetişməsində öz tohfəsini verir və verəcəkdir. Bu qəbildən olan tədbirlər sırasına təhsilin keyfiyyətini yüksəltmək üçün qabaqcıl müəllimlərin nümunəsini yaymaq çox uzaqgörən və faydalı bir siyasətdir. “Ən yaxşı müəllim mükafatının təsis edilməsi haqqında” Azərbaycan Respublikası Prezidentinin 4 sentyabr 2007-ci il tarixli 2372 nömrəli Sərəncamı ilə əlaqədar Təhsil Nazirliyi 20 oktyabr 2008- ci il tarixli 1154 nömrəli əmrlə 2008-2009 cu dərs ilində “Ən yaxşı müəllim” müsabiqəsinin keçirilməsi ilə bağlı Təşkilat komitəsi yaradılmışdı.

Müsabiqənin qalibləri sırasında XXİ Əsr Ümumtəhsil Mərkəzinin İngilis dili müəllimi Gulşən Səmədova da var. Gülşən xanımın müsabiqədə nümayiş etdirdiyi “Musiqi” mövzusunda dərs ekspertlər tərəfindən yüksək peşəkarlıq nümunəsi kimi qiymətləndirilmişdir. Gülşən xanımın təşkilat komitəsi qarşısındakı təqdimat da yüksək qiymətlə qiymətləndirilmişdir. Bu peşəkarlıq neçə-neçə illər ərzində yorulmadan çalışmağın,daim kamilləşmək istəyinin labüd nəticəsidir.

Gülşən Səmədova 2004 –cü ildən Umumtəhsil Mərkəzində çalışır. Gülşən Səmədova Mərkəzdə işlədiyi müddət ərzində şagirdlərdə İngilis dilinə marağın artmasına, onların bu dildə sərbəst danışıq bacarıqlarına yiyələnməsinə və şagirdlərin yaradıcılıq qabiliyyətlərini inkişaf etdirməyə çalışmışdır. Atalar məsəlinə görə “Ağac bəhrəsi ilə tanınar” deyirlər və Gülşən müəllimənin şagirdləri də öz bacarıqları ilə seçilirlər. Onların ifa etdikləri səhnəciklər,bədii giraət nümunələri və mahnılar, iştirak etdiyi layihələr hər zaman seçilmişdir. Öz peşəkarlığını daim artıran Gülşən xanım mərkəzin rəhbərliyi,  işçi kollektivi, müəllimləri və valideynlərinin hörmətini qazanmışdır və bu müsabiqədəki nailiyyəti onun XXİ Əsr Ümumtəhsil Mərkəzinin şagirdlərinin layiqli nəticələrə nail olması üçün gəstərdiyi səylərinin nəticəsidir.